art. 1 Num e domicil

Cul num Uniun da giuventetgna Trun (UdgT) seformescha in’uniun el senn digl artechel 60 e suandonts dil cudisch civil svizzer da cuoz nundeterminau che ha siu domicil a Trun.

art. 2 Intent

Ils intents dall’Uniun da giuventetgna:

  • organisar arranschaments
  • promover la cultivaziun da differents usits
  • promover la cumpignia denter la giuventetgna
  • promover e sustener iniziativas ed ideas dalla giuventetgna

art. 3 Commembers

Mintga giuven che ha terminau il temps da scola obligatori e che ha siu domicil ella vischnaunca da Trun, sa daventar commember dall’Uniun da giuventetgna Trun.

Giuvenils che vulan daventar commembers dall’UdgT, han denton las scartiras en in’autra vischnaunca ed ein ligiai sin ina u l’autra moda culla vischnaunca, san vegnir recepi en votaziun alla radunonza generala.

Il di ch’il commember marida eis el buca pli ell’Uniun da giuventetgna Trun. Mintga commember che paga dus onns in suenter l’auter buca la contribuziun annuala vegn exclaus dall’uniun a caschun dalla proxima radunonza generala.

art. 4 Recepziun

A caschun dalla finiziun da scola organisescha l’UdgT ina fiasta da novizs. L’entira annada ei envidada a quella fiasta. Il datum per la fiasta vegn mintgamai fixaus dalla suprastonza. Per daventar commember dall’UdgT ston ils interessai s’annunziar a scret.

art. 5 Dretgs ed obligaziuns

Mintga commember gauda tut ils avantatgs dall’uniun. Plinavon ha el il dretg da votar, da far propostas ed iniziativas. La recepziun oblighescha il commember da renconuscher las statutas sco era tuttas decisiuns pridas legalmein entras l’UdgT ni la suprastonza. Mintga commember ei obligaus da collaborar a caschun da tuttas occurrenzas organisadas dall’Uniun da giuventetgna Trun.

Mintga commember che vegn elegius per in uffeci ei obligaus da surprender quel per ina perioda da dus onns.

art. 6 Abdicaziun

Mintga commember sa abdicar per la fin settember. La brev che cuntegn ils motivs per l’abdicaziun sto el tarmetter al president. Lez prelegia la brev a caschun dalla radunonza generala.

art. 7 Organisaziun

Ils organs dall’Uniun da giuventetgna Trun ein:

  • la radunonza generala
  • la suprastonza
  • il comite d’organisaziun (4 ni 6 persunas che sustegnan e segidan culla suprastonza)
  • dus revisurs da quen

art. 8 La radunonza generala

La radunonza generala ei en tuts graus il suprem organ dall’UdgT e vegn tenida ina gada ad onn duront l’emprema jamna da november. Ella ei obligatoria per tut ils commembers.

Las tractandas statutaricas dalla radunonza generala ein:

  • avertura ed appel
  • approbaziun dalla gliesta da tractandas
  • approbaziun dil protocol
  • rapport dil president
  • rendaquen, rapport dils revisurs da quen ed approbaziun dil quen
  • fixaziun dalla contribuziun annuala
  • entradas ed extradas da commembers
  • elecziuns
  • program da lavur
  • varia

art. 9 Radunonzas extraordinarias

Ulteriuras radunonzas extraordinarias san vegnir convocadas sin conclus dalla suprastonza ni sin giavisch a scret da silmeins 1/3 dils commembers. 

art. 10 Modus da votar

Per ch’ina radunonza generala possi prender conclus ston silmeins 1/5 dils commembers esser presents. Tier tuttas decisiuns ed elecziuns vala il maun pli.

art. 11 Suprastonza

La suprastonza vegn elegida dalla radunonza generala per ina perioda da dus onns. Ella vegn formada dil president, actuar e cassier. Enteifer sias cumpetenzas ei la suprastonza libra en siu agir, sto denton dar plaid e fatg a caschun dalla radunonza generala. La suprastonza prepara e convochescha las radunonzas. Ella elaborescha plinavon il program da lavur e procura per la realisaziun da quel.

art. 12 President

Il president representa l’Uniun da giuventetgna Trun. El presidiescha las radunonzas ed exequescha il program da lavur. Plinavon presidiescha el il comite d’organisaziun.

art. 13 Actuar

Igl actuar scriva tut ils protocols. Plinavon ha el quitau digl archiv dall’Uniun da giuventetgna Trun.

art. 14 Cassier

Il cassier administrescha la cassa dall’UdgT e renda annualmein quen a caschun dalla radunonza generala. Serrada dil quen annual ei mintgamai ils 30 da settember.

art. 15 Comite d’organisaziun

Il comite d’organisaziun vegn elegius dalla radunonza generala per ina perioda da dus onns e consista da quater ni sis commembers ed il president dall’Uniun da giuventetgna Trun ch’ei medemamein il president dil comite d’organisaziun. In commember dil comite d’organisaziun vegn elegius sco actuar dil comite d’organisaziun. Il comite d’organisaziun ha d’exequir acziuns surdadas ad el entras la suprastonza dall’UdgT e da far propostas a quella per ulteriurs arranschaments. Tier scadina radunonza generala escha il president dil comite d’organisaziun sur da sia lavur. Plinavon ha ina persuna mintgamai da menar protocol sur da tut las sedutas tenidas. Il president dil comite d’organisaziun ha da rimnar ils protocols e dar giu quels suttascrets agl actuar dall’UdgT.

art. 16 Ils revisurs da quen

Ils revisurs da quen vegnan elegi dalla radunonza generala per ina perioda da dus onns. Els controlleschan il quen dall’UdgT e rapporteschan a caschun dalla radunonza generala surdlunder.

art. 17 Il responsabel pil material

Il responsabel pil material ha da tener uorden culla vestgadira da s. Clau sco era digl ulteriur material dall’uniun. Plinavon ha el da preparar il material per la fiasta da Sontgaclau, da lavar e deponer ei. El vegn elegius dalla radunonza generala per ina perioda da dus onns.

art. 18 Ils bandierels

Ils dus bandierels han da purtar la bandiera da fiastas religiusas da processiun e da sepultura da commembers. Els vegnan elegi dalla radunonza generala per ina perioda da dus onns.

art. 19 Presas

Presas dall’Uniun da giuventetgna Trun ei ex officio il plevon da Trun che sa era numnar per quei uffeci in auter spiritual ch’ei responsabels visavi el. Il presas ei il cau spiritual dall’UdgT e survigilescha gl’agir da quella el senn dils statuts.

art. 20 Program da lavur

Il program da lavur per l’Uniun da giuventetgna Trun cumpeglia in program obligatori ed in program variont. Il program obligatori sto vegnir menaus atras mintg’onn.

  1. a) Il program obligatori cumpeglia ils suandonts arranschaments:
  • proclamar la radunonza generala
  • organisar in’occurenza festiva
  • mantener e promover igl usit da s. Clau
  • far tschupi
  • mantener e promover ils usits religius
  1. b) Il program variont sa vegnir fixaus da cass tier cass entras la suprastonza ni entras ina iniziativa che silmeins 1/5 dils commembers ston suttascriver. Sur digl exequir ni tralaschar quellas iniziativas decida la suprastonza.

art. 21 Usit da s. Clau

L’Uniun da giuventetgna Trun organisescha igl usit da s. Clau tenor il suandont sistem:

Cun publicaziuns la fin october vegn dau la pusseivladad alla populaziun dalla vischnaunca da Trun dad inoltrar annunzias per la viseta da s. Clau. La suprastonza procura per las persunas che fan s. Clau e reparta las casadas a quellas a caschun dalla radunonza generala.

art. 22 Far tschupi

Per tuts nozzadurs sin igl intschess dalla vischnaunca da Trun vegn, aschinavon che tals giavischan, fatg tschupi. L’organisaziun da far tschupi surpren il comite d’organisaziun. 

art. 23 Usits religius

Ils commembers dallas duas pli giuvnas annadas ein obligai da collavurar a caschun dalla fiasta da s. Crest, Num da Maria e Dumengia dil s. Rusari entras purtar las bandieras e la statua da Nossadunna.

art. 24 Sepulturas da commembers

La sepultura da scadin commember assista ina delegaziun dall’Uniun da giuventetgna Trun rendend la davosa honur cun la bandiera al defunct.

art. 25 Finanzas

Las finanzas dall’Uniun da giuventetgna Trun secumponan da:

  • taxa annuala che vegn fixada mintgamai a caschun dalla radunonza generala
  • regals e donaziuns da tiarzas persunas
  • recavs d’arranschaments

art. 26 Revisiun dils statuts

Ina revisiun dils statuts ei mo pusseivla tier la radunonza generala.

art. 27 Dissoluziun dall’Uniun da giuventetgna Trun

Sedissolva l’Uniun da giuventetgna Trun zacu, vegn sia facultad administrada dil cassier dalla pleiv en favur dalla nova uniun che duess seconstituir cun ils medems intress sco l’uniun dissolvada. Seconstituescha ina tala buc enteifer 10 onns, croda la facultad miez alla baselgia parochiala da Trun e miez alla vischnaunca politica da Trun.

art. 28 Disposiziun executorica

Quests statuts ein vegni redigi formalmein per persunas masculinas. Tuttas determinaziuns valan denton conform al senn era per persunas femininas.

art. 29 Disposiziun transitoria

Quests statuts ein vegni approbai dalla radunonza generala ordinaria dils 4 da november 2016 ed entran en vigur cun quei datum. Els remplazzan tut ils conclus pri entochen oz ed ils statuts dils 4 da november 2011.